U nonno mio sapia fari tutti i cuosi

Quandu p'a sciada pe nnu chiuovu
si perciava na rota d'a bicicretta

nciu dicivi o nonno mio e ijiu t'a consava

Quandu a funtana d'u paisi
e puru chijia di ncia casa perdia

tu chiamavi o nonno mio e ijiu t'a consava

Si guastava nu 'nterruttori
nu filu na lampadina

"o cumpari Micu, simu o scuru!"

viatu pigghiava a sciada pemmu vena
mu torna u lusciu ncia casa

Ma ijiu cuomu urifici era canusciutu
u rioggiaru era a specializzazioni

I rioggi chi consava eranu tanti
picciriji e randi e sbegli

na vota puru chijiu d'a chiesola
chijiu si ca era giganti

Mo restau sulu a memoria
e quandu mi vidanu mi dinnu

"U niputi d'u urifici"